إهداء ليكي وإنتي عارفة إنتي مين , مش ضعف مني صدقني , جاررني ليكي شوق و حنين.
سامحني لو القشرة الرقيقة اللي كنت مستخبي وراها إتكسرت.
ليكي بأقولها ,أيوه تاني, وتدمع عنيا لما مرة أتخيلك.. ترديها بكلمة حب زييها.
ليكي إنتي مع إني عارف إنها ممكن نهاية, لكن ساعات.. تبقي النهاية هي البداية وكل الحكاية..
أيوه تاني هقولك..وحشتيني..
الأه خارجة
من جوه قلبي
تحترق
ليه كل ما
يجمعنا يوم
ف التاني
نفترق
ليه كل ما
نار حبي تقيد
ف لحظة تنطفي
ليه كل ما
حلمي يبان
ف لمحة يختفي
ليه و مليون ليه
ف قلبي تتخلق
ومنين يجيني شعاع
لضلامي يخترق
دايماً تقولي
"إحنا صحاب حلوين
وخلينا كده"
مش قادرة ليه تفهمي
مش قادرأعيش بالشكل ده
أملي في بكرة
لسة برضه منتهاش
رغم كل حصاري ليه
هرب..وعاش
أملي اللي كنت فاكر
إنه مات
وعدي عليه زمن
وفات
طلع بيخدعني هوا كمان
عايش معشش جوه مني
في كل مكان
جريت وراه مرة
عشان أخنقه
بص لعنيا
لقتني فجأة
بحضنه
مبقتش عارف
مين فينا عايش
جوه مين
خدني وراه
ساحبني..
مش عارف لفين
أملي اللي
كنت بقول
شوية وينتهي
رافض بأستيكة
زماني ينمحي
أملي أعلن
علي هجراني ليكي
الحرب
ماسك في يأسي
من رقبته
ونازل ضرب
أملي العنيد
رافض يموت
رافض يلاقي
أحلى ما ف عمري
يفوت
رافض يسلم
في سكوت
ويرفع الراية
بيضا معلنة
إن الفراق
هو النهاية الممكنة
بقى بيطاردني
في جميع الأمكِنَه
وف كل حته
جوايا
عاملي أكمِنَه
أملي أحبِك
حتى لو من غير أمل
وأعمل لخاطرِك
اللي ما عمره إنعمل
ماهو لو مش حبيبيك
برضه بكره فيه أمل
أصل الحياة
من غير ما إحبِك
جربتها..
لا تحتمل
02/12/2008 2:15 ص