Thursday, November 12, 2009

يا ترى؟؟

النهاردة
عديت على بيتها
صدفة و مقصدتهاش
لكنها
فرصة..ومسبتهاش

عمارات طويلة ضاربة ف السما
شبابيك..
شبابيك كتيرة منورة

ف عمارة منهم مش عارفها
ف شقة من ضمن الشقق
و ف أوضة من جوه الإوض
ع الأرض قاعدة مربعة
ف بـﭼـامة لون فساتين الخطوبة
وشكلها..

جايز تكون
على سريرها ممدة
وع المخدة فاردة شَـعرها

جايز تكون
ماسكة قلمها وزيي
بتكتب شِـعرها

يمكن تكون
بتقرا كتاب
مرة شاورتلها عليه

يمكن تكون
بتسمع غنوة
بتحكي عن نظرة عنييه

وأنا ف طريقي
لمحت عربيتها راكنة
واقفة..
ساكنة..
بصيت لفوق
عمارة عالية
شققها ساكتة
وف واحدة منهم
بنت ساكنة
كانت
مرة زمان
ف قلبي
ساكنة..


Sunday, August 9, 2009

من غير عنوان..ولا معنى كمان

دي حاجات قولتها و مكملتهاش و بيتهيئلي دلوقتي عمري ما هكملها..أصل الحكاية كلها خلصت..
من تاني لنفس الدوامة
ما هي لفت بنا سنين ياما
من نقطة تحت
تحت الصفر
تاخدك و تلف لحد القبر
شهقة ف غرقة
وتنهيدة
وارواح بتموت فينا شهيدة
و صراخ لحياة لسه وليدة
تزعق و تقول "إدوني مكان"
ف الدنيا يا خلق
إنسكوا جان
أه يا عالم وحش وصابه جنان
--------------------


من كتر حزني على
أيام وراحت خلا
ضاعت نواضري ولا
عاد وجعي بان فيهم

همي و هد الحيل
غنيت له مواويل
في صبر قالوا جميل
و ف حنكي كان علقم

----------------------
..
فستذكريني.. كلما
سمعت كلمتان من الغزل
و ستذكريني..كلما
ذاقت شفتاك من طعم القبل
و ستذكرين..من
في عرقك المحموم قد إغتسل
و ستذكرين.. مَن
مِن رحيق زهرتكِ نهل


----------------
قد كتبتُ الشعرَ..
فيِك نثراً
والمقال... موزوناً
في بحورٍ
من تفاعيل الهوى

وقصصت للأيامِ
حكايتي..
وجعاً
من تباريح الجوى

----------------------



حريتي قفصٌ
ناريتي قبسُ
من وهج عينيها


وشدتي يأسٌ
وجرأتي شمسٌ
هي سرُ محياها

وعشقِيَ الحُلُمَ
وتَيمِيَ الكَلِمَ
حبٌ لنجواها

-------------------------



"انا قلبي كان شخشيخة اصبح جرس..
جلجلت بيه صحيوا الخدم و الحرس..
انا المهرج...قمتو ليه خفتو ليه..
لا ف ايدى سيف و لا تحت منى فرس" عمي صلاح جاهين

وبجرسك يا عم جاهين..
راح أعمل أنا جُرسة
أفضح بها خاينين
لابدين كما عِرسة
في قلب بطن الوطن
ينتهزوا ف الفرصة

من أول العقارات
شاليهات و عربيات
ولعب ف البورصة

بإسياخ و طولها صح
نازلين في أهلي دبح

بَزْعق وصوتي إنبح
طب خير بلدنا فين؟!!
قالولي خيرها بح

و خيرها ف غيرها بقى
و الدنيا مش ضيقة

إطفش و منها هج
وإشرب بقى ف المج
وإنسى بقى الخمسينة
وقعدة التراسينا

رديت وكلي شقى
خيرها لغيرها بقى
و بلدنا متزوقة
ليكم ومش لينا

رَدوا بكل "جمال"
خليك لذيذ أُومال
وإكبش من الأموال
متقولش حالها مال
وتعملنا موال

رديت أنا بأسية
هعملكوا مرثية

ألعن بلادي ديه
وناسها الملهية
ف طابور رغيف العيش
ملايين و مستنية

و الباقي راحم فين؟!!
يتفرجوا ع الماتش
ويشوفوا جوزيه هيفضل
ولا في غيره كوتش
و الحضري راح لسيون
ونحط مين ف الجون؟!!
صبحت هي القضية
وناسك يا بلدنا
ناسية و منسية

Thursday, April 23, 2009

ممسوس

ألف شيطانٍ
برأسي يصرخون
كأعماق الجحيم

ألفُ عنوانٍ
لقصيدةٍ وحشيةٍ
في قلبي اليتيم

ألفُ ذئبٍ
ينهشون..
روحاً أثمة
كأرواح البغايا

****

طوفانٌ من سيلان الدم
ليروي شبق الأرض

فيضانٌ من خطباء الفم
بألفِ ألفِ "أما بعد"

وعذارى منتهكي الحرمات
ليولدَ ألفُ ابنٍ للغد

Saturday, April 4, 2009

أه يا بن أدم

أه يا بن أدم
ما أعجبك
أيا إنسان

فيه جوا منك ملاك
وبحر خير وإيمان
لكين جواك
برضك..شيطان
بقرنين و ديل..
وشوكة كما شياطين زمان
كتير ده بيهديك
لكن ساعات
ده برضك بيغويك كمان
وساعات تتوه ولا تبقي عارف
منين و فين..بر الأمان
ما توهش يا بني و إفتكر
إن إنتا واحد م البشر
منتاش ملاك منتاش شيطان
عشها كده..
كما خلقك رب الزمان
ما هو إنت في أصل الخليقة
كان إسمك الإنسان
فيك من دول و من دوكهما
وفيك كل عكس عكيس كمان