Wednesday, January 12, 2011

نَهَجان

زي عادتي بحاول أهرب من دماغي
زي عادتي بحاول أجري من مشاعري
زي عادتي
بحاول أملا في غيابِك ده فراغي

زي عادتي بأستخبى جوا كتبي
,افضل أقرا..أقرا..أقرا..كلام كتير

أي قصة أو حكاية
تافهة كانت أو لغاية

أقرا و أتملا ف ملامحِك
رسمة ماليه كل صفحة
كل بطلة تبقى إنتِ
و إنتِ أحلي
وألقى نفسي..كل أشرار الرواية..

بأقرا من غير الحروف..
بأقرا صِوَرِك في صفوف
فوق سطوري و تحتها
جوا أو بره الكلام
بأقرا صاحي و ف المنام

بأقرا أمسنا و يومنا و بكره
بأقرا فكرة..
مهما كانت بالتقيها إتشكلت بملامحِك إنتِ

بأقرا ضعفي قصاد عنيكي..وأكرهه
وأحبِكِ إنتِ

بأقرا حتي أخبار السياسة..تصدقي؟!!
كل كلمة في مجلة
أو ف صفحة إعلانات
حتي أخبار اللي ماتوا و الرُفات
 بأقرا دلوقتي و بكره و اللي فات

بأقرا ف كل ساعة ألف تدوينة جديدة
بأقرا كل سطر ف كل صفحة ف الجريدة
بس لسه من شوية
من دقايق بس
صدفة
قريت قصيدة..

خلت الدم ف عروقي
يغلي و يفور ويا شوقي

إسمه إيه اللي كاتبها؟!!
لازم أعرف مين و ليه!!
لازم أعرف..إمتى عرفك لأ و حبك؟!!
إتقابلتوا و أهدهالِك؟!!
لازم أعرف إيه حكايته؟
إيه مكانه في حقيقتك؟ أو خيالِك؟

إحكي يلا متنكريش
دي حكاية من ماضيكي؟
إنت عارفة..
اللي فات ميهمنيش
ليه تخبي و متقوليش؟

تاني هتقولي مش إنتِ؟!!!
مستحيل..

كل كلمة قايلها هوا
كل سطر وحرف
كل نقطة, فصلة حتى أو علامة
كل حاجة في كلامه
بتوصف البدر بتمامه
يعني إنتِ....

كل تنهيده بحُرقة
كل شهقة و كل غرقة
كل أوصاف الرموش الدباحين
كل مرة
إنقتل فيها.. بعيونكِ
أيوه إنتِ
هوا في غير عيونِك قتالين؟!!!!

كل أوجاعه وآلامه
كل أحلامه ف منامه
كل حواديته وكلامه
كل اشواقه اللي دابوا في بحورِك م الحنين
كل صرخة صرخها قلبه
كل أهه و الأنين
كل ده بيقولي إنتِ
كل ده بيقول حبيبتي

عايزة مني إزاي أصدق
إن غيرِك تخلق الإحساس دا كله؟!!!
مستحيل...

عارفه إيه مَلاني حيرة؟
عارفه إيه موتني غيرة؟
إن توقيعه ف آخر القصيدة
نفس إسمي......

3 comments: